Jer 41 | NdeIBE | STEP | Ngenyanga yesikhombisa u-Ishmayeli indodana kaNethaniya, indodana ka-Elishama, owayeyinzalo yesikhosini, njalo owayengomunye wezikhulu zenkosi, waya kuGedaliya indodana ka-Ahikhami eMizipha

Jeremiah 41

1 Ngenyanga yesikhombisa u-Ishmayeli indodana kaNethaniya, indodana ka-Elishama, owayeyinzalo yesikhosini, njalo owayengomunye wezikhulu zenkosi, waya kuGedaliya indodana ka-Ahikhami eMizipha

2 lamadodana kaNethaniya lamadoda alitshumi ayelaye basukuma bamgwaza ngenkemba uGedaliya indodana ka-Ahikhami, indodana kaShafani, bambulala lowo owayebekwe yinkosi yaseBhabhiloni ukuba ngumbusi welizwe. 3 UIshmayeli wabulala lamaJuda wonke ayeloGedaliya eMizipha kanye lamabutho amaKhaledi ayelapho.

4 Ngosuku olwalandela ukubulawa kukaGedaliya, kungakabi lamuntu owayesesazi ngakho, 5 kwafika amadoda angamatshumi aficaminwemibili evela eShekemu, leShilo leSamariya ayephuce indevu zawo izigqoko zawo zidabukile njalo ezisike imizimba, elethe iminikelo yamabele lempepha endlini kaJehova.

6 U-Ishmayeli indodana kaNethaniya wasuka eMizipha ukuyawahlangabeza; wahamba ekhala. Ekuhlanganeni kwakhe labo wathi, “Wozani kuGedaliya indodana ka-Ahikhami.”

7 Kwathi sebengene phakathi kwedolobho u-Ishmayeli indodana kaNethaniya kanye lamadoda ayelaye, bawabulala bawaphosela emgodini. 8 Kodwa alitshumi awo athi ku-Ishmayeli, “Ungasibulali! Silengqoloyi lebhali, lamafutha loluju, esikufihle egangeni.” Ngakho wawayekela kaze awabulala lamanye. 9 Umgodi ayephosele kuwo zonke izidumbu zamadoda ayewabulele kanye loGedaliya ngowawenziwe yinkosi u-Asa kuyingxenye yokuzivikela kwakhe kuBhahasha inkosi yako-Israyeli. U-Ishmayeli indodana kaNethaniya wawugcwalisa ngezidumbu.

10 U-Ishmayeli wabenza baba yizigqili bonke abantu ababeseMizipha – amadodakazi enkosi kanye labanye bonke ababetshiywe khona nguNebhuzaradani umlawuli wabalindi besikhosini, owayebeke uGedaliya indodana ka-Ahikhami ukuba ngumbusi wabo. U-Ishmayeli indodana kaNethaniya wabathumba, wasuka ukuba achaphele kuma-Amoni.

11 Kwathi uJohanani indodana kaKhareya kanye lezikhulu zonke zebutho ezazilaye sebezwe konke okubi okwakwenziwe ngu-Ishmayeli indodana kaNethaniya, 12 bathatha bonke abantu babo bayakulwa lo-Ishmayeli indodana kaNethaniya. Bamfica phansi kwechibi elikhulu eGibheyoni. 13 Kwathi abantu bonke ababelo-Ishmayeli bebona uJohanani indodana kaKhareya lezikhulu zebutho ezazilaye, bathaba. 14 Bonke abantu u-Ishmayeli ayebathumbe eMizipha baphenduka baya kuJohanani indodana kaKhareya. 15 Kodwa u-Ishmayeli indodana kaNethaniya labantu bakhe abayisificamibili baphunyuka kuJohanani babalekela kuma-Amoni.

Ukubalekela EGibhithe

16 Emva kwalokho uJohanani indodana kaKhareya, lezikhulu zonke zebutho ezazilaye, wathatha bonke abasilayo ababevele eMizipha ayebahlenge ku-Ishmayeli indodana kaNethaniya emva kokubulala kwakhe uGedaliya indodana ka-Ahikhami. Kwakungamabutho, labesifazana, labantwana kanye lezikhulu zasemthethwandaba ayezithethe eGibheyoni. 17 Baqhubeka bahamba, bayakuma eGeruthi Khimihami eduze leBhethilehema, besiya eGibhithe

18 ukuba babalekele amaKhaledi. Babewesaba ngoba u-Ishmayeli indodana kaNethaniya wayebulele uGedaliya indodana ka-Ahikhami owayebekwe yinkosi yaseBhabhiloni ukuba abe ngumbusi welizwe.